Os avogados percibirán de media un 15% máis que co baremo actual
A Coruña, 2 de novembro de 2021. A Vicepresidencia Primeira e Consellería de Presidencia, Xustiza e Turismo da Xunta de Galicia e o Consello da Avogacía Galega acordaron o novo baremo de compensacións polas intervencións da Quenda de Oficio. Esta actualización supón un importante incremento da partida orzamentaria destinada á Asistencia Xurídica Gratuíta para os vindeiros anos.
Desde o Consello da Avogacía Galega resáltase que o incremento das cantidades do baremo da Quenda de Oficio é unha das súas reivindicacións históricas para a dignificación deste servizo público, prestado pola Avogacía para garantir a tutela xudicial efectiva da cidadanía.
O Consello da Avogacía Galega, a través da súa comisión negociadora e mediante a proposta consensuada polos 7 colexios que o conforman, promoveu que as subidas se realicen sobre os módulos que demandan máis designacións (87% do total), de modo que, nestes conceptos, o incremento medio supera o 19%. Para o resto dos asuntos, 12,72% do total, a subida aceptada media é do 4,93%.
Ademais, no baremo aprobado inclúense novos conceptos e mellórase a redacción doutros, aceptándose así, en parte, as propostas colexiais orientadas a mellorar as remuneracións dos profesionais da Avogacía adscritos á Quenda de Oficio.
Este novo acordo entrará en vigor a partir do cuarto trimestre do 2021 e ten unha duración de catro anos, ata o ano 2025, momento no que se abrirá un novo proceso negociador. As cantidades actualizaranse ao longo do próximos tres anos segundo estas porcentaxes:
Por último, a Dirección Xeral de Xustiza comprometeuse a estudar como garantir o pago das actuacións profesionais en defensa de investigados insolventes, incluídas persoas xurídicas, aos que non se lles concede o dereito á asistencia xurídica gratuíta por pasividade ou imposibilidade legal, o que obriga a que os profesionais presten os seus servizos sen contraprestación algunha. Esta garantía conseguiríase a través dun novo convenio ou dunha reforma regulamentaria.
