Os días 4 e 5 de abril terá lugar unha nova edición das Xornadas de Dereito de Familia, organizadas polo Ilustre Colexio Provincial de Avogados da Coruña e polo Consello da Avogacía Galega.
Estas xornadas, que supoñen un punto de encontro para os profesionais que se dedican ao dereito de familia, celebraranse na Fundación Barrié.
Con aforo limitado e tamén con formato en liña, nelas daranse cita prestixiosos xuristas para abordar cuestións de máxima actualidade relativas ao ámbito da familia tales como a nova Lei de Familia, as urxencias en Familia, a repercusión da globalización no Dereito de Familia, as pensións alimenticias, a violencia de xénero, o coidado de maiores e a análise da xurisprudencia máis recente do Tribunal Supremo en asuntos de familia, discapacidade e filiación.
Nesta edición continuarase coa fórmula do foro aberto: un espazo no que se debatirán temas e cuestións formuladas previamente polos asistentes ás xornadas.
O Consello da Avogacía Galega asinou un novo convenio de colaboración co IGVS (Instituto Galego de Vivenda e Solo), organismo autónomo adscrito á Consellería de Medio Ambiente, Territorio e Vivenda, mediante o cal o CAG presta os seguintes servizos:
– Asesoramento gratuíto para evitar que persoas en situación de desamparo perdan a súa vivenda habitual ou, no seu caso, poidan acollerse aos programas existentes en materia de acceso á vivenda.
– Asesoramento gratuíto para posibilitar que as persoas físicas propietarias ou usufrutuarias de vivendas que sexan ocupadas ilegalmente saiban como actuar ante esta situación.
Consultar texto convenio
Asesoramento gratuíto
Como froito dese convenio, póñense a disposición da cidadanía dúas vías:
O CAG elaborou dúas guías informativas referidas aos trámites de
carácter administrativo ou xudicial no ámbito relacionado cos dereitos e
obrigas das persoas afectadas por desafiuzamentos ou ocupación ilegal
da vivenda.
Desafiuzamento de vivendas. Guía informativa para persoas afectadas
A ocupación ilegal da vivenda. Guía informativa para persoas afectadas
O Consello da Avogacía Galega asinou un convenio de colaboración co Instituto Galego de Vivenda e Solo para prestar un servizo de asesoramento, intermediación e orientación xurídica en materia de vivenda.
Froito dese Convenio xurden estas conferencias sobre a Lei polo dereito á vivenda, gratuítas e abertas a todos e todas as profesionais da avogacía galega, para mellorar a súa formación en materia de vivenda.
Esta formación, de carácter gratuíto, está dirixida ás avogadas e aos avogados pertencentes aos colexios da avogacía de Galicia e alumnado do Mestrado de Acceso á Avogacía interesados na materia de vivenda.
Aquelas e aqueles interesados en inscribirse no programa de clases en liña deberán premer AQUÍ e cubrir o formulario.
O rexistro a través do formulario dará dereito ao acceso a ambas as dúas conferencias en liña do programa. Non será preciso repetir a inscrición para cada xornada.
A Xunta de Galicia, a través das Consellerías de Presidencia, Xustiza e Deportes e de Política Social e Igualdade, en colaboración co Consello da Avogacía Galega, asinou un convenio para fortalecer a atención xurídica especializada ás mulleres vítimas de violencias sexuais. Este acordo enmárcase nas actuacións previstas no Pacto de Estado contra a Violencia de Xénero e reforza o compromiso conxunto de ambas as institucións coa erradicación da violencia machista.
O convenio ten como finalidade garantir que todas as mulleres vítimas de delitos contra a liberdade sexual dispoñan de asesoramento xurídico inicial, asistencia letrada nas primeiras dilixencias e acompañamento legal especializado, independentemente dos seus recursos económicos. Este servizo prestarase as 24 horas do día e estará respaldado por avogados e avogadas con formación específica na materia.
Avances destacados e próximos pasos
Como parte deste convenio, o Consello da Avogacía Galega está ultimando a redacción dunha guía informativa dirixida ás mulleres vítimas de violencias sexuais, que será presentada formalmente nos próximos días. Este recurso busca ofrecer información clara e accesible sobre os dereitos das vítimas, os recursos dispoñibles e os pasos legais que poden seguir para protexerse e buscar xustiza. A guía incluirá un glosario de termos clave e explicará con rigor as ferramentas xurídicas e sociais ao alcance das afectadas.
Declaración institucional
O presidente do Consello da Avogacía Galega, Francisco José Rabuñal Mosquera, indicou:
«A guía que estamos ultimando será unha ferramenta clave para informar ás vítimas dos seus dereitos e dos recursos dispoñibles, facilitando así o seu acceso a unha protección efectiva.»
Distribución e difusión da guía
A guía será accesible de forma gratuíta en formato dixital a través dos canles oficiais da Xunta de Galicia e do Consello da Avogacía Galega. Tamén será distribuída en puntos clave de atención ás vítimas, como os centros de información á muller, oficinas de atención ás vítimas do delito e colexios da avogacía en toda Galicia.
Compromiso coa loita contra a violencia de xénero
Este convenio representa un paso decisivo para consolidar un sistema integral de atención ás mulleres vítimas de violencias sexuais, en liña cos compromisos adquiridos no marco do Pacto de Estado contra a Violencia de Xénero. Xunta e Consello da Avogacía Galega traballan conxuntamente para garantir que todas as mulleres teñan acceso a unha protección xurídica especializada e a recursos que lles permitan superar estas situacións con dignidade e xustiza.
O Consello da Avogacía Galega asinou un convenio de colaboración coa Consellería de Presidencia, Xustiza e Deportes para o desenvolvemento de atención profesional a persoas menores de idade vítimas de situacións de violencia, de acoso escolar e de ciberacoso.
